شان مسعود کا اعلان - جنوبی افریقا کے خلاف جیت کے لیے 20 وکٹیں ہمارا ہدف

شان مسعود کا اعلان — جنوبی افریقا کے خلاف جیت کے لیے 20 وکٹیں ہمارا ہدف

قومی ٹیسٹ کرکٹ ٹیم کے کپتان شان مسعود نے کہا ہے کہ ٹیم نئی ٹیسٹ چیمپئن شپ میں بہترین اور مثبت آغاز کرنے کے لیے پُرعزم ہے اور کھلاڑی مکمل تیاری کے ساتھ میدان میں اُتریں گے۔

لاہور میں پریس کانفرنس کرتے ہوئے شان مسعود نے بتایا کہ اس بار پاکستان کرکٹ بورڈ (پی سی بی) نے ریڈ بال کرکٹ کے لیے جامع منصوبہ بندی کی ہے۔ کیمپس لگائے گئے جبکہ متعدد کھلاڑیوں نے کاؤنٹی کرکٹ کھیل کر اپنی فارم اور فٹنس برقرار رکھی۔

کپتان کا کہنا تھا کہ جنوبی افریقا ایک مضبوط اور تجربہ کار ٹیم ہے، اور ہم ان کے خلاف اچھا کھیل پیش کر کے اپنا اعتماد بلند کرنے کی کوشش کریں گے۔ ٹیسٹ میچ جیتنے کے لیے 20 وکٹیں حاصل کرنا کلیدی ہدف ہے، اسی حکمتِ عملی کے تحت تیاری جاری ہے۔

شان مسعود نے زور دیا کہ اس سائیکل میں ہوم سیریز کی اہمیت بہت زیادہ ہے۔ پچھلی ٹیسٹ چیمپئن شپ کے نتائج اگرچہ مطلوبہ سطح کے نہیں تھے، مگر کئی مثبت نکات سامنے آئے۔ ان کا کہنا تھا کہ مقصد یہی ہے کہ اس بار آغاز سے ہی مضبوط پرفارمنس دکھائی جائے۔

انہوں نے کہا کہ اگر وکٹیں زیادہ فلیٹ ہوں اور دونوں ٹیمیں 600 رنز بنا لیں تو اس کا کھیل کے معیار پر کوئی فائدہ نہیں۔ بہتر نتائج کے لیے بعض اوقات رنز کی قربانی دینا پڑتی ہے۔ ان کے مطابق ہر میچ میں سنچری ضروری نہیں، بلکہ کنڈیشنز کے مطابق کھیلنا زیادہ اہم ہے۔

کپتان نے مزید کہا کہ قذافی اسٹیڈیم کی نئی کنڈیشنز کو سمجھنے کی کوشش کی جا رہی ہے۔ ساجد خان ان حالات میں ایک اہم بولر ہیں، تاہم وہ حال ہی میں وائرل فلو کا شکار رہے۔ فائنل ٹیم کا انتخاب کھلاڑیوں کی فٹنس کو مدنظر رکھ کر کیا جائے گا۔

آخر میں شان مسعود نے کہا کہ ہوم کنڈیشنز سے زیادہ سے زیادہ فائدہ اٹھانا ضروری ہے۔ ماضی میں ہم نے تین اسپنرز اور ایک فاسٹ بولر کے کمبی نیشن کے ساتھ کھیلا، لیکن اس بار فیصلہ پچ کی صورتِ حال دیکھ کر کیا جائے گا، اور ریورس سوئنگ کو بھی حکمتِ عملی کا حصہ بنایا گیا ہے۔